༄༅།། བཞུགས་སྒར་ཀིརྟིའི་བྱེས་པ་གྲྭ་ཚང་གི་འདུས་མང་ཡོངས་ནས་འཇིག་རྟེན་ཞི་བདེའི་དེད་དཔོན། ཁ་བ་གངས་ཅན་པ་རྣམས་ཀྱི་ལྟ་བའི་མིག་དང་ཁོག་པའི་སྙིང་ལྟར་གྱུར་པ་འཕགས་མཆོག་ཕྱག་ན་པདྨོ་གསུམ་ལྡན་ངུར་སྨྲིག་འཛིན་པའི་རྣམ་རོལ་དུ་བྱོན་པ་༸སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་དང་། བདག་ཅག་སློབ་བརྒྱུད་ཡོངས་ཀྱི་འདི་ཕྱིའི་ཚེ་རབས་གཏན་གྱི་སྐྱབས་གནས་དམ་པ་
༸རོང་ཆེན་བསྟན་པའི་སྒྲོན་མེ་༸སྐྱབས་རྗེ་ཀིརྟི་རིན་པོ་ཆེ་མཆོག་གིས་གཙོས་རིས་མེད་བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་བརྟན་ཅིང་ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པ་དང་། གྲྭ་ཚང་གི་དགེ་འདུན་པ་ཀུན་གྱིས་བསླབ་པ་སློབ་གཉེར་དང་། ཁ་འདོན་དགེ་སྦྱོར་སོགས་རྣམ་དཀར་གྱི་བྱ་བ་གང་བརྩམ་གེགས་མེད་ལམ་ལྷོང་ཡོང་བ། དེ་བཞིན་གྲྭ་ཚང་འདི་ལ་འབྲེལ་ཐོགས་པའི་བསྟན་པའི་སྦྱིན་བདག་རྣམས་ཀྱིས་རང་རང་གི་ཆོས་ལྡན་གྱི་བྱ་བ་ཐམས་ཅད་ཡིད་བཞིན་དུ་འགྲུབ་པ་སོགས་ལ་དམིགས་༸ས་སྐྱ་གོང་མ་བདག་ཆེན་རིན་པོ་ཆེ་མཆོག་དང་།
འདི་ག་གྲྭ་ཚང་གི་བླ་ན་མེད་པའི་དབུ་ཁྲིད་༸སྐྱབས་རྗེ་ཀིརྟི་རིན་པོ་ཆེ་རྣམ་པ་གཉིས་ལ་ཐུགས་དམ་ཞུས་པའི་བཀའ་ལན་རིམ་གྲོ་ཅི་ཕེབས་རྣམས་ཉིན་གྲངས་ཆ་བགོས་ཀྱིས་ཕྱི་ཟླ་ ༣ ཚེས་ ༦ ནས་སྒྲོལ་མ་འབུམ་འདོན། རྒྱལ་བའི་བཀའ་འགྱུར་རིན་པོ་ཆེ་ཆ་ཚང་དག་འདོན། ཛམ་དཀར་གཏེར་སྒྲུབ་ཟུར་ཚོགས་ཀྱིས་ཉིན་བདུན། རྣམ་སྲུས་གཡང་འགུགས་དང་བཟློག་ཆེན། རྣམ་རྒྱལ་སྟོང་མཆོད། སྒྲོལ་ཆོག་སྟོང་ཚར། ཆོས་སྲུང་སོ་སོའི་གསོལ་མཆོད་རྒྱས་པ། མགོན་པོ་གུར་ཞལ་གཉིས་དང་དཔལ་ལྡན་ལྷ་མོ། སྐུ་ལྔ། དཔལ་བོ་རྩལ་བཅས་ཀྱི་བསྐང་བཤགས་གྲངས་གསོག ཞི་རྒྱས་དབང་གསུམ་གྱི་སྦྱིན་སྲེག་སོགས་ཕྱི་ཚེས་ ༢༣ བར་ཉིན་བཅུ་བདུན་རིང་སྨིན་བསྒྲུབས་གནང་བ་དང་།
ཉིན་དེར་འདི་ག་གྲྭ་ཚང་ནས་མདོ་ཕྱོགས་བཀའ་པོད་ལྔར་མི་ལོ་བཅོ་བརྒྱད་ལྷག་རིང་སྦྱངས་པ་གནང་ནས་སྐབས་དང་པོའི་བསླབ་པ་མཐར་སོན་གྱི་ཁོངས་ནས་བླ་གྲྭ་བཞིས་མཁས་གྲུབ་བྱེ་བའི་འབྱུང་གནས་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་ནས་དགེ་བཤེས་དམ་བཅའ་ལེགས་པར་གྲུབ་པའི་དགའ་སྟོན་རྟེན་འབྲེལ་དུ་གྲྭ་མང་ཡོངས་ལ་གསོལ་ཚིགས་རྒྱས་པ་དང་སྐུ་འགྱེད་བཅས་བསྟར་འབུལ་དང་། གྲྭ་ཚང་གི་མཁན་ལས་སྣེ་དང་དགེ་འདུན་འདུས་མང་བཅས་ཀྱིས་ལེགས་སོའི་སྔགས་བརྗོད་དང་མཇལ་དར་སྒྲོན་པ་སོགས་གནང་ནས་མཇུག་གི་བྱ་བ་དགེ་བའི་རིམ་པ་རྣམས་ཀྱང་ལེགས་པར་གྲུབ།
ཕྱི་ཚེས་ ༢༤ ཉིན་ལོ་རེའི་བཞུགས་ཤག་རྒྱན་དཀྲུག་བྱེད་སྲོལ་ཡོད་པ་ལྟར་བགྱིས་ཏེ་ཉིན་གཉིས་ལ་གུང་སེང་དང་། ཕྱི་ཚེས་ ༢༧ ཉིན་གྱི་སྔ་དྲོ་འཛིན་གྲྭ་སོ་སོའི་འཛིན་ཁང་ཁག་གཙང་སྦྲ་དང་ཕྱི་ཉིན་ནས་ལོ་གསར་པའི་སློབ་སྦྱོང་སོགས་བྱེད་སྒོ་རྣམས་མགོ་འཛུགས་བྱ་རྒྱུ་ཡིན་པ་བཅས།
 |
 |
 |
 |
 |
 |
 |
 |
 |
 |
 |
|
 |
 |
 |
