༄༅།། དེ་རིང་གི་མཛད་སྒོ་འདི་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་ལྷ་དབྱར་གསོ་དང་འབྲེལ་བའི་དགའ་སྟོན་གྱི་མཛད་སྒོ་ཞིག་ཡིན་དུས། ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས་ཞུ།

མི་མང་པོ་ཞིག་ལྷན་ཅིག་ཏུ་འཛོམས་ནས་དུས་སྟོན་བྱས་པ་འདི་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་སྲུང་བརྩི་ཞུ་སྟངས་ཤིག་ཡིན་ན་ཡང་འཁྲུངས་སྐར་སྲུང་བརྩི་ཞུ་སྟངས་གལ་ཆེ་ཤོས་དང་གཙོ་བོ་ནི། བོད་མི་ཡོངས་རྫོགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ངོས་ཟིན་པ་དགོས་པ་དང་བཀའ་དྲིན་དྲན་དགོས་པ་འདི་གལ་ཆེ་ཤོས་ཡིན།

༸གོང་ས་༸སྐྱབས་མགོན་ཆེན་པོ་མཆོག་གིས། ཕྱི་ལོ་ ༡༩༥༠ ལོ་ནས་ཕྱི་ལོ་ ༢༠༡༡ ལོའི་བར་མི་ལོ་ཧྲིལ་པོ་དྲུག་ཅུ་ལྷག་རིང་བོད་གཞུང་དགའ་ལྡན་ཕོ་བྲང་གི་དབུ་ཁྲིད་གནང་སྟེ་བོད་རྒྱ་ཆེའི་མི་མང་གི་བདེ་སྡུག་གི་དོན་དུ་ཕྱག་ལས་གནང་བ་རེད། དགུང་ལོ་བཅུ་དྲུག་ནས་དགུང་ལོ་བདུན་ཅུ་དོན་བདུན་བར་དུ་བོད་སྤྱི་པའི་བདེ་སྡུག་གི་དོན་དུ་ཉིན་མཚན་སྦྲེལ་ནས་སྐུ་ལས་བསྐྱོན་ཡོད་པ་བོད་མི་ཡོངས་རྫོགས་ཀྱི་སེམས་ལ་གསལ་པོ་ཡོད།

༸གོང་ས་༸སྐྱབས་མགོན་ཆེན་པོ་མཆོག་གི་ཐུན་མོང་མ་ཡིན་པའི་མཛད་པ་ནི་བསམ་གྱིས་མི་ཁྱབ་པ་སྔོན་བྱོན་རྒྱལ་བློན་པཎ་གྲུབ་སུས་ཀྱང་མཛད་མ་མྱོང་བགསར་གཏོད་ཀྱི་རང་བཞིན་ལྡན་པའི་མཛད་པ་ཤ་སྟག་ཏུ་གྱུར་ཡོད་དུས། དེང་སང་འཛམ་གླིང་ནང་ཏཱ་ལའི་བླ་མ་ཞེས་པའི་མཚན་སྙན་གྲགས་ཀྱིས་ཁྱབ་ཐུབ་པ་ཞིག་བྱུང་ཡོད།

བོད་མི་རིགས་ལ་ཛ་དྲག་གི་དཀའ་ངལ་འཕྲད་ནས་མི་རིགས་འདི་འཛམ་གླིང་འདིའི་སྒང་ནས་བརླག་འགྲོ་བའི་ཉེན་ཁའི་མཚམས་སུ་ལྷུང་བའི་སྐབས། ༸རྒྱལ་བ་རིན་པོ་ཆེས་བོད་མི་རིགས་ཛ་དྲག་གི་དཀའ་ངལ་དེ་ལས་བསྐྱབས་ཏེ་འཛམ་གླིང་ནང་གི་སྐྱབས་བཅོལ་བ་གཞན་དང་མི་འདྲ་བའི་ཆེ་མཐོང་དང་ཆ་འཇོག་ཡོད་སའི་མི་རིགས་ཤིག་ཏུ་བཟོ་ཐུབ་ཡོད། དེ་ཡིན་དུས་བོད་མི་རིགས་སྤྱི་པའི་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ཞུ་བ་དང་ཆབས་ཅིག སྒེར་སོ་སོའི་ངོས་ནས་ཡིན་ནའང་༸རྒྱལ་བ་རིན་པོ་ཆེའི་བཀའ་དྲིན་དྲན་པའི་སྒོ་ནས་༸རྒྱལ་བ་རིན་པོ་ཆེའི་དགོངས་པ་དང་མཐུན་པ་བྱེད་ཐུབ་པ་གང་དང་གང་འདུག རང་རང་སོ་སོའི་ངོས་ནས་གང་དང་གང་བྱེད་ཐུབ་ཀྱི་འདུག་ཅེས་རྒྱུན་དུ་བསམ་བློ་བཏང་ནས་༸རྒྱལ་བ་རིན་པོ་ཆེའི་བཀའ་གསུང་ཅི་སྒྲུབ་ཞུ་དགོས་པ་འདིཤིན་ཏུ་ནས་གལ་ཆེན་པོ་རེད། ༸རྒྱལ་བ་རིན་པོ་ཆེའི་ཞལ་མཇལ་བ་དང་བཀའ་སློབ་ཞུས་པའི་སྐབས་༸རྒྱལ་བ་རིན་པོ་ཆེའི་ཞལ་མཇལ་གསུང་ཐོས་པས་སྐལ་བ་བཟང་པོ་བྱུང་སོང་ཟེར་ནས་བཤད་པ་ཙམ་མིན་པར། ༸རྒྱལ་བ་རིན་པོ་ཆེས་གསུངས་པའི་བཀའ་སློབ་དེ་དག་མི་སོ་སོའི་ཉིན་རེའི་འཚོ་བའི་ནང་ལག་ལེན་དུ་བསྟར་དགོས་པ་དེ་གལ་ཆེ་ཤོས་རེད། ༸རྒྱལ་བ་རིན་པོ་ཆེའི་བཀའ་སློབ་ཀྱི་ནང་དོན་ནི་ཕྱོགས་དང་རིས་སུ་མ་ཆད་པ་སྟེ་ཐ་ན་མི་སྒེར་སོ་སོའི་ཉིན་རེའི་འཚོ་བ་སྐྱེལ་སྟངས། ཆོས་པ་ཚོས་ཐོས་བསམ་སྒོམ་སྒྲུབ་གནང་སྟངས་ནས་བཟུང་སྟེ་གནད་དོན་འདིའི་ཐོག་ལ་བཀའ་སློབ་ལམ་སྟོན་མ་གནང་བྱ་བ་གཅིག་ཀྱང་མེད་དུས་༸རྒྱལ་བ་རིན་པོ་ཆེའི་བཀའ་སློབ་དེ་དག་རང་རང་གི་སེམས་ལ་བཟུང་ནས་ཅི་ནུས་གང་ནུས་ཀྱིས་ལག་ལེན་དུ་བསྟར་དགོས་པ་དེ་སྤྱི་སྒེར་རང་གཞན་སུ་ཞིག་གི་ངོས་ནས་བཤད་ཀྱང་ཤིན་ཏུ་གལ་ཆེན་པོར་ཆགས་ཡོད།

ལྷག་པར་དུ་ཕྱི་ལོ་ ༡༩༥༩ ལོར་༸རྒྱལ་བ་རིན་པོ་ཆེ་རྒྱ་གར་དུ་ཆིབས་བསྒྱུར་གནང་བའི་སྐབས་གཞི་རྩ་གང་ཡང་མེད་པའི་ས་ནས་བཙན་བྱོལ་བོད་གཞུང་གསར་དུ་བཙུགས་པ་ཙམ་མིན་པར། བོད་ཀྱི་མ་འོངས་པའི་སོན་རྩ་གཞོན་སྐྱེས་ཚོ་ལ་སློབ་སྦྱོང་བྱེད་སའི་སློབ་གྲྭ་ཁག་མང་པོ་གསར་འཛུགས་མཛད་པ་དང། དེ་བཞིན་དུ་ཆོས་བརྒྱུད་རིས་མེད་ཀྱི་དགོན་སྡེ་ཁག་མང་པོ་གསར་འཛུགས་གནང་བ་སོགས་ལོ་མང་པོའི་རིང་སྐུ་ལས་བསྐྱོན་པའི་ཐུགས་རྗེ་བཀའ་དྲིན་ལ་བརྟེན་ནས་ང་ཚོ་བཙན་བྱོལ་པ་འདྲ་འདྲའི་ནང་ནས་མ་འདྲ་བ་ཞིག་ཏུ་ཆགས་ཐུབ་ཡོད་ལ། བོད་ནང་གི་རྒྱ་ཆེའི་མི་མང་ལ་ཅི་ཙམ་གྱི་དཀའ་ངལ་ཆེན་པོ་ཞིག་དང་འཕྲད་ནའང་སེམས་ཁུང་ནས་ཕྱི་ལ་རེ་བ་རྒྱག་ས་ཞིག་བྱུང་སྟེ། ང་ཚོ་སྡུག་བསྔལ་འདི་ལས་སྐྱོབ་མཁན་ཞིག་ཕྱི་ན་ཡོད་སྙམ་པའི་སེམས་ཤུགས་ཀྱི་ཐོག་ནས་སྔོན་ནས་ད་ལྟའི་བར་དུ་རེ་བ་རྒྱག་ས་ཡོད་པ་ཞིག་གནང་ཡོད། ༸རྒྱལ་བ་རིན་པོ་ཆེ་བོད་རྒྱ་ཆེའི་མི་མང་ལ་བཀའ་དྲིན་ཆེན་པོ་ཅི་ཙམ་ཡིན་པ་ངས་ཞིབ་ཕྲར་ཞུ་མ་དགོས་པར་རྣམ་པ་ཚོའི་ཐུགས་ལ་གསལ་པོ་ཡོད་པ་དེ་རེད།

ཁ་སང་དེ་རིང་ལྟ་བུར་མཚོན་ན་༸རྒྱལ་བ་རིན་པོ་ཆེ་དགུང་ལོ་མཐོ་པོ་ཇི་ཙམ་ལ་ཕེབས་ཡོད་ཀྱང་ད་དུང་ཡིན་ནའང་གཡས་སྐྱོར་གཡོན་སྐྱོར་བྱས་ནས་ཕེབས་ཏེ་བཀའ་སློབ་གནང་དགོས་སར་བཀའ་སློབ་གནང། དངོས་སུ་ཕེབས་ཐུབ་ས་ལ་ཕེབས་ནས་སྐུ་ངལ་ལ་མ་འཛེམས་པར་ཉིན་མཚན་ལྟོས་མེད་ཀྱིས་མཛད་པ་བསྐྱངས་གནང་གི་ཡོད། ༸རྒྱལ་བ་རིན་པོ་ཆེས་སྐུ་ལས་ཚད་མེད་བསྐྱོན་པ་ནང་བཞིན་ང་ཚོ་མི་རེ་ངོ་རེ་ནས་བྱེད་དགོས་པ་གང་དང་གང་འདུག།འདིའི་ཐོག་ལ་བོད་མི་ཡོངས་རྫོགས་ཀྱིས་དགོངས་པ་བཞེས་རྒྱུ་གལ་ཆེན་པོ་རེད། ༸རྒྱལ་བ་རིན་པོ་ཆེས་བོད་མི་མང་ཡང་དག་པའི་མང་གཙོའི་ལམ་དུ་ཁྲིད་པར་གནང་སྟེ་མང་གཙོའི་རང་བཞིན་ལྡན་པའི་གཞུང་བཙུགས་ཡོད་དུས་མི་མང་ལ་གཞུང་སྐྱོང་དགོས་པའི་འགན་ཁུར་དང་བསམ་བློ་གཉིས་ཀ་ཡོད་དགོས། གཞུང་གིས་ཕྱག་ལས་གནང་ཕྱོགས་འགྲིག་གི་ཡོད་མེད་ལ་མི་མང་གིས་དོ་སྣང་བྱས་ཏེ་ཕྱག་ལས་གནང་ཕྱོགས་འགྲིག་གི་ཡོད་ན་ཡོད་པ་དང་མེད་ན་མེད་པའི་བསམ་ཚུལ་ལྷག་བསམ་རྣམ་དག་གིས་ཤོད་དགོས་པའི་འགན་དབང་གཉིས་ཀ་ཡོད། གང་ལྟར་བོད་རྒྱ་ཆེའི་མི་མང་གིས་བོད་གཞུང་སྐྱོང་ཐུབ་པ་དང་༸རྒྱལ་བ་རིན་པོ་ཆེས་གནང་བའི་གཞུང་དེ་སྲ་བརྟན་ཡུན་གནས་ཐུབ་ཐབས་ལ་འབད་བརྩོན་བྱ་དགོས་པ་འདི་ཤིན་ཏུ་ནས་གལ་ཆེན་པོ་རེེད།

སྔོན་མ་(དགའ་ལྡན་ཕོ་བྲང་པས་གཞུང་བསྐྱངས་པའི་)སྐབས་ཤིག་ལ་རྒྱ་གར་ཤར་ཕྱོགས་ངྷེ་བྷི་གྷར་ཞེས་པར་གནམ་ཐོག་ནས་ཆིབས་བསྒྱུར་བསྐྱངས་སྐབས། གནམ་གྲུ་སྐྱོ་པོ་ཞིག་དང་གནམ་གཤིས་ཤིན་ཏུ་ངན་པ་ཞིག་བྱུང་སྟེ་ཉེན་ཁ་ཆེན་པོ་ཞིག་འཕྲད་པའི་སྐབས་ཀྱི་གནས་ཚུལ་སྐུ་མདུན་གྱིས་བཀའ་སློབ་གནང་བ་ཞིག་ངས་ལུང་འདྲེན་ཞུ་གི་ཡིན། དེ་རིང་ང་ཕལ་ཆེར་ཤི་ས་རེད། ད་ལྟའི་ཆར་ང་ཤི་བ་ཡིན་ན་འགྲིག་མ་སོང། བོད་རྒྱ་ཆེ་མི་མང་ངས་བློས་ཐོངས་མ་སོང། ཞེས་བཀའ་གནང་ཡོད། ༸རྒྱལ་བ་རིན་པོ་ཆེས་བོད་རྒྱ་ཆེའི་མི་མང་གི་དོན་ལ་འདི་འདྲའི་འགན་ཁུར་དང་ཐུགས་ཁུར་ཆེན་པོ་ཞིག་བཞེས་ཀྱི་ཡོད་པ་དེ་ང་ཚོས་ཤེས་དགོས། རྗེས་མ་རྣམ་པ་ཚོས་ཤེས་གསལ་ལྟར་བོད་ཆོལ་ཁ་གསུམ་གྱི་ནང་ཁུལ་མ་འཆམ་པ་དང་མ་མཐུན་པའི་གནས་ཚུལ་ཕྲན་བུ་ཞིག་བྱུང་བའི་སྐབས་དེར། ༸རྒྱལ་བ་རིན་པོ་ཆེས། ད་ང་བསྡད་དང་མ་བསྡད་ལ་ཁྱད་པར་མི་འདུག་བསམ་པ་དྲན་བྱུང། ཞེས་བཀའ་གནང་ཡོད། སྐུ་མདུན་ལ་འདི་ལྟ་བུའི་ཐུགས་ཕམ་བྱུང་བ་དེ་བོད་མི་སེམས་ཡོད་དང་བསམ་ཤེས་ཅན་ཡོངས་རྫོགས་ཀྱི་སེམས་ལ་ངེས་ཀྱི་ཡོད་དུས། ད་ཆ་སེམས་ཤུགས་བསྒྲིམས་ནས་༸རྒྱལ་བ་རིན་པོ་ཆེའི་ཐུགས་ཕམ་དྭངས་པ་ཞིག་ཡོང་བར་འབད་བརྩོན་གནང་དགོས། བོད་ཆོལ་ཁ་གསུམ་གྱི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་ཡོང་བ་ལ་བོད་མི་ཡོངས་རྫོགས་ཀྱིས་འགན་ཁུར་ནས་ཤུགས་བརྒྱག་དགོས། བོད་མིའི་ནང་ཁུལ་ལ་མ་འཆམ་པའི་གནས་ཚུལ་ཕྲན་བུ་ཞིག་བྱུང་བ་ཡིན་ན་རྒྱ་ནག་གཞུང་དགའ་པོ་ཡོང་བ་དང་༸རྒྱལ་བ་རིན་པོ་ཆེ་ཐུགས་ཕམ་ཡོང་བའི་རྒྱུར་ཆགས་ཀྱི་ཡོད། བོད་མི་ནང་ཁུལ་ལ་མ་འཆམ་པ་བྱུང་བའི་ལས་ཀ་དེ་དགྲ་དགའ་གཉེན་སྡུག་གི་ལས་ཀ་རེད།

ང་ཚོའི་གཞུང་འདི་མང་གཙོའི་གཞུང་ཡིན་དུས་མང་གཙོའི་ལམ་དུ་འགྲོ་དགོས་ཀྱི་ཡོད། ཡིན་ནའང་བཤད་ཕོད་པ་དང་བསམ་ཕོད་པ། ལས་ཕོད་པ་ཙམ་མིན་པར། བཤད་ཕོད་པ་དང་ལས་ཕོད་པ་དེས་ཕན་ཐོགས་ཡོང་གི་འདུག་གམ་མི་འདུག བཤད་པ་དང་ལས་པ་དེས་གནོད་པ་ཡོང་གི་འདུག་གམ་མི་འདུག འདིའི་ཐོག་ལ་བསམ་བློ་གཏོང་དགོས་པ་དེ་གལ་ཆེན་པོ་རེད། ཁ་ནས་གང་བྱུང་མང་བྱུང་སུ་ལ་ཡིན་ནའང་ཤོད་རྒྱུ་ཡོད། བཤད་པ་དང་ལས་པ་དེས་གཞུང་དང་མི་མང་ལ་ཕན་ཐོགས་ཀྱི་འདུག་གམ་མི་འདུག འདི་ལ་རྣམ་པ་ཚོས་དགོངས་པ་བཞེས་དགོས། རང་རང་གིས་གང་དྲན་བཤད། གང་དྲན་ལས་བསྡད་མཁན་གྱི་མི་འགའ་ཤས་ཡོད་པ་དེ་དག་ལ་སེམས་ཤུགས་དང་ལྷག་བསམ་མེད་པ་ཞིག་ཡིན་མི་སྲིད། བསམ་བློ་གཏོང་སྟངས་དང་སྐད་ཆ་ཤོད་སྟངས་མ་ཤེས་ན། རང་གིས་གང་བཤད་པ་དང་གང་ལས་པ་དེས་སྤྱི་པའི་ལས་དོན་དང་ནང་ཁུལ་གྱི་མཐུན་ལམ་ལ་ཕན་ལས་གནོད་པ་ཆེ་བ་ཡོང་སྲིད་པ་རེད་བསམས། ༸རྒྱལ་བ་རིན་པོ་ཆེས་རྒྱུན་དུ་གསུངས་པའི་སྒྲུང་ཐུང་ཞིག་ཞུ་འདོད་བྱུང། ༸རྒྱལ་བ་རིན་པོ་ཆེས། བུ་གླེན་པས་ཕ་ཡི་ཀླད་པ་བཅོམ། ཞེས་པའི་སྒྲུང་འདི་ལན་མང་པོར་བཀའ་གནང་མྱོང་ཡོད། སྔོན་ཕ་རྒན་ཞིག་དང་བུ་གླེན་པ་ཞིག་ཡོད། ཁོ་ཕ་བུ་གཉིས་ཀྱི་བར་ལ་བརྩེ་བ་གཏིང་ཟབ་ཡོད་དུས། ཐེངས་ཤིག་ཕ་རྒན་ན་སྟེ་ཉལ་ནས་ཡོད་པའི་སྐབས་སྦྲང་བུ་ཞིག་འཕུར་ཡོང་ནས་ཕའི་མགོ་ལ་བབས་ནས་སུན་པོ་བཟོས་པ་རེད། བུ་གླེན་པ་དེས་ཕའི་མགོར་བབས་པའི་སྦྲང་བུའི་ཐོག་ཁོང་ཁྲོ་ལངས་ནས་སྦྲང་བུ་དེ་ཕར་འདེད་ཚུར་འདེད་བྱས་ནས་ཕ་རྒན་ལ་སུན་པོ་མི་ཡོང་ཐབས་བྱས། སྦྲང་བུ་དེ་འཕུར་ནས་ཀ་བ་ཞིག་གི་ངོས་ལ་བབས་པ་ལྟ་བུ་ཞིག་མཐོང་བའི་སྐབས། བུ་གླེན་པ་དེ་སྦྲང་བུའི་ཐོག་ཁོང་ཁྲོ་ཟ་བཞིན་ཀ་བའི་ངོས་སུ་ནག་རིལ་རིལ་ཞིག་ཡོད་པ་དེའི་ཐོག་ལ་ཁུ་ཚུར་གཞུས་པའི་སྐབས། ནག་རིལ་རིལ་ཞིག་ཡོད་པ་དེ་སྦྲང་བུ་མིན་པར་འཛེར་ཀ་ཞིག་ཡིན་དུས་ལག་པར་རྨ་བཟོས་ནས་ན་ཟུག་ཆེན་པོ་བྱུང་བས་སྔར་ལས་ཀྱང་ཁོང་ཁྲོ་ཆེན་པོ་ལངས་ན་དབྱུག་པ་ཞིག་བཟུང་སྟེ་སྦྲང་བུ་དེའི་རྗེས་དེད་ནས་ཕྱིན་པའི་སྐབས། མཐའ་མ་སྦྲང་བུ་དེ་ཕའི་མགོ་ལ་བབས་པ་ན་ཁོས་ཕའི་མགོ་ལ་བབས་པའི་སྦྲང་བུ་ལ་དབྱུག་པ་གཞུས་ནས་ཕ་བསད་པ་རེད། ཁོའི་བསམ་པ་ལ་ཕ་རྒན་ལ་ཤ་ཚ་དང་ཕན་སེམས་བྱེད་ཀྱི་ཡོད་ནའང་ཕན་སེམས་བྱེད་སྟངས་དང་ཤ་ཚ་བྱེད་སྟངས་མ་ཤེས་པའི་དབང་གིས་སྦྲང་བུ་གསོད་ཀྱི་ཡིན་སམས་ནས་རང་གི་ཕ་རྒན་བསད་པ་རེད། དེ་ལ་བུ་གླེན་པས་ཕ་ཡི་ཀླད་པ་བཅོམ་ཟེར་བའི་གཏམ་དཔེ་འདི་བྱུང་བ་རེད། ང་ཚོ་བོད་མི་རྣམས་ཀྱིས་ཤ་ཚ་བྱེད་སྟངས་ཤེས་དགོས་པ་དང། བོད་སྤྱི་པའི་ལས་དོན་སྒྲུབ་སྟངས་ཤེས་དགོས་པ་འདི་གལ་ཆེན་པོ་རེད། བོད་སྤྱི་པའི་ལས་དོན་སྒྲུབ་སྟངས་མ་ཤེས་དུས་རང་གིས་ལྷག་བསམ་བྱེད་ཀྱི་ཡོད་པའི་དབང་དུ་བྱས་ཀྱང་དངོས་ཡོད་གནས་ཚུལ་ལ་ཕན་ལས་གནོད་པ་ཆེ་བ་ཞིག་འབྱུང་སྲིད། རྣམ་པ་ཚོས་ལས་དོན་གང་འདྲ་ཞིག་བསྒྲུབས་པ་ཡིན་ནའང་བསམ་བློ་བཏང་ནས་གཟབ་གཟབ་བྱ་དགོས། དེས་སྤྱི་པའི་ལས་དོན་ལ་ཕན་གནོད་གང་ཞིག་ཡོང་གི་ཡོད་མེད་ལ་བལྟས་ནས་ལས་འགུལ་སྤེལ་དགོས་པ་དང་སྐད་ཆ་བཤད་དགོས་པ་དེ་གལ་ཆེན་པོ་རེད་ཅེས་བཤད་དོད་བྱུང། 

གོང་དུ་ཞུས་པ་བཞིན་༸རྒྱལ་བ་རིན་པོ་ཆེས་མི་ལོ་དྲུག་ཅུ་ལྷག་རིང་བསྐྱངས་པའི་གཞུང་འདི་མ་འོངས་པར་བརྟན་པོར་གནས་དགོས་པ་འདི་ཤིན་ཏུ་ནས་གལ་ཆན་པོ་རེད། བོད་ནང་གི་རྒྱ་ཆེའི་མི་མང་གིས་༸རྒྱལ་བ་རིན་པོ་ཆེས་སྐུ་ལས་བསྐྱོན་ནས་བཙུགས་པའི་གཞུང་དེ་ལ་སྙིང་ཁུང་རུས་པའི་གཏིང་ནས་ཡིད་ཆེས་དང་རེ་བ་ཞུས་ཏེ། ཕྱི་ལོགས་སུ་ང་ཚོ་སྡུག་བསྔལ་ལས་སྐྱོབ་མཁན་གྱི་གཞུང་ཞིག་ཡོད་སྙམ་པའི་རེ་བ་ཆེན་པོ་བརྒྱབས་ནས་སྡོད་ཀྱི་ཡོད། བོད་གཞུང་འདི་བརྟན་པོ་གནས་ཐབས་ལ་བོད་མི་ཡོངས་རྫོགས་ཀྱིས་བསམ་བློ་བཏང་ནས་ལས་ཀ་བྱ་དགོས། ༸རྒྱལ་བ་རིན་པོ་ཆེས་ཆབ་སྲིད་ཀྱི་སྐུ་དབང་ཡོངས་རྫོགས་བོད་མི་མང་གིས་འོས་ཤོག་འཕེན་པའི་ལམ་ནས་བདམས་པའི་དབུ་ཁྲིད་ཚོ་ལ་རྩིས་སྤྲོད་གནང་ཟིན་པའི་སྐབས་བཀའ་སློབ་འདི་འདྲ་ཞིག་གནང་ཡོད། ད་ང་བློ་བདེ་པོ་བྱུང་། ང་མི་གཅིག་ཡོད་དང་མེད་ལ་ཁྱད་པར་མེད་པར་བོད་ཀྱི་རྩ་དོན་འདི་བརླག་མི་འགྲོ་བ་དང། བོད་ཀྱི་བདེན་དོན་འཐབ་རྩོད་བྱེད་པའི་གཞུང་དེ་མུ་མཐུད་བརྟན་པོར་གནས་ཐུབ་པར་ཆགས་སོང། ཞེས་བཀའ་གནང་ཡོད་པ་རྣམ་པ་ཚོས་མཁྱེན་གསལ་ལྟར་རེད། ༸རྒྱལ་བ་རིན་པོ་ཆེས་སྐུ་ལས་བསྐྱོན་ནས་བཙུགས་པའི་གཞུང་དེ་མུ་མཐུད་བརྟན་པོ་གནས་དགོས་པ་འདི་ཤིན་ཏུ་གལ་ཆེན་པོ་རེད། ༸རྒྱལ་བ་རིན་པོ་ཆེས་སྐུ་ལས་བསྐྱོན་ནས་བཙུགས་པའི་གཞུང་དེ་འཕྲོ་བརླག་ཏུ་མི་འགྲོ་བའི་ཆེད་དུ་ང་ཚོ་མི་རེ་རེའི་ངོས་ནས་སྒྲུབ་ཐུབ་པ་གང་དང་ང་འདུག་བསམ་བློ་གཏོང་དགོས། བོད་གཞུང་ལ་ཞབས་ཕྱི་ཞུ་དགོས་པའི་འགན་བོད་མི་ཡོངས་རྫོགས་ལ་གཅིག་མཚུངས་ཀྱིས་ཡོད། ང་ལྟ་བུར་མཚོན་ན་ཡང་ལོ་བདུན་ཅུ་དོན་བརྒྱད་ཡིན། རྣ་བས་གསལ་པོ་གོ་ཐུབ་ཀྱི་མེད་དུས་གོང་དུ་གསུང་བཤད་གནང་བ་མང་ཆེ་བ་གོ་མ་བྱུང། དེ་བཞིན་དུ་སྙིང་དང་གཅིན་སྙིལ་ན་ཚ་ཡོད་ནའང་འདི་ག་ལ་ཤོག་གསུང་དུས་ཡོང་ནས་སྐད་ཆ་ཚིག་འགའ་ཤས་ཤིག་བཤད་པ་ཡིན་ན་ཕན་ཐོགས་ཕྲན་བུ་རེ་ཨེ་ཡོང་སམས་ནས་ཡོང་བ་ཡིན། ཚིག་རེ་ཟུང་ཞིག་ཞུས་པ་ཡིན་ན་རྣམ་པ་ཚོར་ཕན་ཐོགས་རེ་ཨེ་ཡོང་བསམས་ནས་རྣམ་པ་ཚོར་ཞུ་གི་ཡོད། སྐད་ཆ་ཚིག་འགའ་ཤས་ཤིག་བཤད་པ་ཙམ་མ་གཏོགས་ང་ལ་འཇོན་ཐང་དང་ནུས་པ་གང་ཡང་མེད་ནའང་ངས་ལྷག་བསམ་རྣམ་དག་གིས་རྣམ་པ་ཚོར་ཞུས་པ་དེར་གསན་གྱི་རེད་སྙམ་པའི་རེ་བ་བྱེད་ཀྱི་ཡོད། རྣམ་པ་ཚོས་ང་ལ་བོད་སྤྱི་པའི་འགན་ཁུར་མཁན་དང། ལྷག་པར་དུ་མདོ་སྨད་སྤྱི་པའི་མི་ཞིག་དང་༸རྒྱལ་བ་རིན་པོ་ཆེའི་ཞབས་ཕྱི་རྙིང་པ། བོད་གཞུང་ལ་ལྷག་བསམ་རྣམ་དག་བྱེད་མཁན་ཞིག་ཡིན་པར་ཡིད་ཆེས་དང་ངོས་འཛིན་གནང་གི་ཡོད་དུས་ངས་ཞུས་པ་ལ་རྣམ་པ་ཚོས་གསན་གྱི་རེད་བསམ་པའི་རེ་བས་ཞུ་གི་ཡོད།

བོད་གཞུང་འདི་གནས་མ་ཐུབ་པར་ཐོར་བ་ཡིན་ན་རྒྱ་ནག་གུང་ཁྲན་གཞུང་དགའ་གི་རེད། རྒྱ་གུང་ཁྲན་གྱིས་དངོས་ཤུགས་བརྒྱུད་གསུམ་ནས་བོད་གཞུང་གནས་མི་ཐུབ་པར་འཐོར་ཞིག་ཏུ་འགྲོ་བའི་ཐབས་ལ་འབད་བརྩོན་བྱེད་ཀྱི་ཡོད། རྒྱ་ནག་གཞུང་གིས་གནའ་སྔ་མོ་ནས་བཟུང་བོད་གཞུང་འདི་གཏོར་རྒྱུའི་ཐབས་ཤེས་དང་བོད་མི་ནང་ཁུལ་གྱི་མཐུན་ལམ་གཏོར་བའི་ཐབས་ཤེས། བོད་མི་ནང་ཁུལ་ལ་རྫུན་དང་ཕྲ་མ་བཤད་པའི་ཐབས་ཤེས་ད་ལྟའི་བར་དུ་མཚམས་མ་ཆད་པར་བྱས་མྱོང་ཡོད་དུས་དེ་ལ་བོད་མི་རྣམས་ཀྱིས་རྒྱུན་དུ་དོགས་ཟོན་གནང་སྟེ་ནང་ཁུལ་མཐུན་པོ་ཡོང་ཐབས་བྱ་དགོས། གལ་སྲིད་མི་ཞིག་གིས་སྐད་ཆ་མི་བདེན་པ་དང་ནང་ཁུལ་གྱི་མཐུན་ལམ་ལ་གནོད་གཞིའི་ལས་ཀ་ཞིག་བྱེད་ཀྱི་འདུག་ན། གཅིག་གིས་གཅིག་ལ་བསླབ་བྱ་བརྒྱབས་ཏེ་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་སྒྲིལ་གྱི་ཐོག་ལ་གནས་ཐབས་བྱ་དགོས། བོད་ནང་དུ་སྡོད་མཁན་གྱི་བོད་མི་ཚོས་ཉིན་རེའི་འཚོ་བ་སྐྱེལ་སྟངས་ཚུན་ཆད་ལ་ཡང་དཀའ་ངལ་ཆེན་པོ་ཡོད་པ་དེ་ཞུ་མ་དགོས། མི་མང་པོ་ཞིག་གློ་བུར་བཙོན་ཁང་དུ་བཅུག་ནས་གར་སོང་ཆ་མེད་གྱུར་ཏེ་ཤི་གསོན་ཙམ་ཡང་ཧ་མ་གོ་བའི་གནས་སྟངས་རྒྱུན་མ་ཆད་པར་ཡོང་གི་ཡོད། དཔེར་ན། པཎ་ཆེན་ཆུང་སྲིད་རིན་པོ་ཆེ་ལྟ་བུར་མཚོན་ན་ཤི་དང་གསོན་གང་ཡིན་ཧ་གོ་ཐུབ་ཀྱི་མེད། བོད་ནང་གི་བོད་མི་ཚོའི་ཚེ་སྲོག་མི་གཞན་ཞིག་གི་ལག་ཏུ་བཟུང་ནས་བོད་མིའི་ཚེ་སྲོག་བོད་མི་རང་ཉིད་ལ་མི་དབང་བར་ཚེ་སྲོག་གི་བདག་པོ་དང་ཚེ་སྲག་ལ་དབང་བསྒྱུར་མཁན་གཞན་ཞིག་ཡོད་པའི་སྐབས་འདིར་བོད་ནང་གི་བོད་མི་ཚོས་བོད་གཞུང་འདི་ལ་རེ་བ་བརྒྱག་གི་ཡོད།

༸རྒྱལ་བ་རིན་པོ་ཆེས་ད་ལྟའི་ཆར་དངོས་སུ་བོད་གཞུང་གི་དབུ་ཁྲིད་གནང་གི་མེད་ནའང་བོད་རྒྱ་ཆེའི་མི་མང་གིས་གཞུང་འདི་༸རྒྱལ་བ་རིན་པོ་ཆེས་དབུཁྲིད་པའི་གཞུང་ཡིན་པའི་ངོས་འཛིན་དང་ཡིད་ཆེས་བརྟན་པོ་བྱས་ནས་བསྡད་ཡོད། བོད་མི་བཙོན་ཁང་དུ་ཚུད་པ་ཚོས་༸རྒྱལ་བ་ཡིད་བཞིན་ནོར་བུ་མཁྱེན་ཟེར་ནས་གསོལ་འདེབས་ཞུས་པ་དང་ཆབས་ཅིག ༸རྒྱལ་བ་རིན་པོ་ཆེ་དང་བོད་གཞུང་གིས་ང་ཚོ་སྡུལ་བསྔལ་འདི་ལས་གྲོལ་ཐབས་བྱེད་ཀྱི་རེད་སྙམ་པའི་རེ་བ་དང་ཡིད་ཆེས་བརྟན་པོ་བྱས་ནས་བསྡད་ཡོད། རང་སྲོག་བློས་གཏོང་མཁན་ཚོས། རང་གི་ཚེ་སྲོག་བློས་བཏང་བ་ཡིན་ན་འདི་ལ་བརྟེན་ནས་མ་འོངས་པར་བོད་སྤྱི་པའི་དོན་ལ་གྲུབ་འབྲས་བཟང་པོ་ཐོན་པ་ཞིག་ཡོང་གི་རེད་སྙམ་པའི་རེ་བ་བྱས་ཡོད་དུས། ཁོང་རྣམ་པས་ཐུགས་རེ་གནང་བ་བཞིན་གྲུབ་འབྲས་བཟང་པོ་ཐོན་པ་ཞིག་བྱེད་ཐུབ་མིན་ནི་ཕྱི་ལོགས་སུ་ཡོད་པའི་ང་ཚོའི་གཞུང་དང་མི་མང་གི་ལག་ཏུ་ཡོད། ང་ཚོའི་གཞུང་འདི་འཐོར་ཞིག་ཏུ་ཕྱིན་ནས་བརླགས་པ་ཡིན་ན་འཛམ་གླིང་འདིའི་ནང་ནས་བོད་མི་རིགས་ཟེར་བ་དེ་རྩ་བརླག་ཏུ་འགྲོ་རྒྱུ་ཐག་ཉེ་བོར་རང་བཞིན་གྱིས་ཆགས་འགྲོ་གི་རེད། བོད་ཀྱི་སྐད་དང་ཡི་གེ་མི་ཤེས་མཁན་དང། བོད་ཀྱི་རིག་གཞུང་གོམས་གཤིས་མི་ཤེས་མཁན་གྱི་བོད་མི་མང་པོ་ཞིག་བྱུང་བ་ཡིན་ན། མཚམས་ཤིག་ནས་བོད་ཀྱི་མི་རབས་གསར་པ་རྣམས་རྒྱ་མ་བོད་ཅིག་ཏུ་འགྱུར་འགྲོ་གི་རེད། བོད་མི་རིགས་འདི་འཛམ་བུ་གླིང་འདི་ནས་རྩ་བརླག་ཏུ་མི་འགྲོ་བ་ལ་༸རྒྱལ་བ་རིན་པོ་ཆེས་བཙུགས་པའི་བོད་གཞུང་འདི་བརྟན་པོར་གནས་ཐབས་བྱ་དགོས་པ་འདི་ཤིན་ཏུ་གལ་ཆེན་པོ་ཡིན་དུས། ༸རྒྱལ་བ་རིན་པོ་ཆེས་བཙུགས་པའི་བོད་གཞུང་འདི་ལ་ང་ཚོས་རྒྱབ་སྐྱོར་དང་བརྩི་བཀུར་ཞུ་དགོས། རང་གི་གཞུང་ལ་རང་གིས་བརྩི་བཀུར་མི་ཞུ་ན་གཞན་པ་སུས་བརྩི་བཀུར་བྱེད།

ཁ་སང་དེ་རིང་གི་དུས་ཚོད་འདི་ཤིན་ཏུ་ཛ་དྲག་ཆེ་བའི་སྐབས་ཤིག་ཏུ་གྱུར་ཡོད། བོད་ཕྱི་ནང་གཉིས་ཀ་ལ་མི་ཐོག་གསར་རྙིང་བརྗེས་ནས་མི་ཐོག་རྙིང་པ་ཉུང་ཤས་མ་གཏོགས་ལྷག་མེད། ༸རྒྱལ་བ་རིན་པོ་ཆེའི་དགུང་ལོ་ཡང་ཤིན་ཏུ་མཐོ་པོར་ཕེབས་ཟིན་པ་རེད། ༸རྒྱལ་བ་རིན་པོ་ཆེས་དགུང་ལོ་བརྒྱ་དང་བཅུ་གསུམ་ལ་བཞུགས་པའི་ཞལ་བཞེས་གནང་ཡོད་ཀྱང་ཛ་དྲག་གི་སྙུང་གཞི་བཞེས་ཀྱི་ཡོད་དུས་ཛ་དྲག་གི་དུས་ཚོདའདི་ལ་བོད་མི་ཡོངས་རྫོགས་ཀྱིས་ཛ་དྲག་གི་གནས་སྟངས་དང་མཐུན་པའི་ཛ་དྲག་གི་བསམ་བློ་གཏོང་དགོས། ཉེ་ཆར་༸རྒྱལ་བ་རིན་པོ་ཆེ་ལྡི་ལི་ལ་ཛ་དྲག་གིས་སྨན་བཅོས་གནང་བར་ཕེབས་པ་རེད། དེ་ནས་ཉི་མ་འགའ་ཤས་ཀྱི་རྗེས་སུ་ཡང་བསྐྱར་༸རྒྱལ་བ་རིན་པོ་ཆེ་སྐུ་གཟུགས་མ་བདེ་བ་ཤུགས་ཆེན་པོ་བྱུང་སོང། དེའི་རྗེས་སུ་ཉིན་གཅིག་ལ་སྐུ་མདུན་སྨན་བཅོས་ལ་ཕེབས་པའི་རྣམ་པའི་རླངས་འཁོར་སྐོར་ཞིག་ཛ་དྲག་གིས་བཏང་བྱུང། སྐབས་དེར་ང་མཚམས་ལ་བསྡད་ཡོད། ད་གཏམ་གང་འདྲ་ཞིག་གོ་རྒྱུ་ཡོད་དམ། ད་ང་ཚོ་བོད་པ་འདི་གང་འདྲ་ཞིག་ཏུ་འགྱུར་ཡོང་ངམ་བསམས་ནས་དངངས་སྐྲག་གིས་སེམས་ལ་ཚ་ཤ་བརྒྱབས་བྱུང། ཕྱིས་སུ་གནས་ཚུལ་གསལ་པོ་ཤེས་པའི་སྐབས་ལ་ཛ་དྲག་གི་སྐུ་སྙུང་བཞེས་པ་ཡིན་ན་སྨན་ཁང་ལ་གདན་འདྲེན་ཞུ་སྟངས་ཀྱི་སྦྱོང་བརྡར་ཞིག་རེད་འདུག།གང་ལྟར་ང་ཚོའི་གནས་སྟངས་འདི་འདྲའི་ཛ་དྲག་གི་སྐབས་སུ་སླེབས་ཡོད་དུས་༸རྒྱལ་བ་རིན་པོ་ཆེས་རྒྱུན་དུ། རེ་བ་བཟང་ས་ལ་རྒྱོབས། གྲ་སྒྲིག་སྡུག་ས་ནས་བྱོས། ཞེས་བཀའ་གནང་གི་ཡོད་པ་ལྟར་ང་ཚོས་༸རྒྱལ་བ་རིན་པོ་ཆེ་དགུང་ལོ་བརྒྱ་དང་བཅུ་གསུམ་ལ་བཞུགས་རྒྱུའི་རེ་བ་བཟང་ས་ནས་བརྒྱག་དགོས་ནའང། བོད་གཞུང་འདི་འཐོར་ཞིག་ཏུ་མི་འགྲོ་བའི་གྲ་སྒྲིག་སྡུག་ས་ནས་བྱེད་དགོས།

༸རྒྱལ་བ་རིན་པོ་ཆེས། ཁོང་ཐང་ཆད་ཀྱི་འདུག།ཅེས་པའི་བཀའ་ལན་མང་པོ་གནང་གི་འདུག།སྐུ་གཟུགས་ཐང་ཆད་ཀྱི་ཡོད་པ་སྨོས་མ་དགོས་ནའང་ཐུགས་ཀྱི་དགོངས་པ་ཡང་ཐང་ཆད་ཀྱི་ཡོད་སྲིད། ༸རྒྱལ་བ་རིན་པོ་ཆེའི་ཐུགས་ཀྱི་དགོངས་པ་ཐང་ཆད་པ་ཞིག་མི་ཡོང་བ་དང་ཐུགས་ཕམ་ཡོང་མི་འཇུག་པའི་འགན་ང་ཚོ་ཡོངས་རྫོགས་ལ་ཡོད། བོད་མི་ཡོངས་རྫོགས་ཀྱིས་མི་རེ་ངོ་རེ་ནས་སྐབས་སུ་བབས་པའི་ལས་འགན་དང་དུ་བླངས་ཏེ་༸རྒྱལ་བ་རིན་པོ་ཆེའི་ཞབས་ཕྱི་ཞུས་པ་ཡིན་ན་བོད་སྤྱི་པའི་ལས་དོན་འགྲུབ་པ་དང་བོད་ཀྱི་བདེན་པའི་མཐའ་གསལ་བ་ཞིག་ཡོང་གི་རེད། ང་ཚོའི་ནང་ཁུལ་ནས་མ་འཆམ་པའི་གནས་ཚུལ་ཕྲན་བུ་ཞིག་བྱུང་བ་ཡིན་ན་དེས་བོད་སྤྱི་པའི་ལས་དོན་ལ་གནོད་པ་ཤིན་ཏུ་ཚབས་ཆེན་པོ་ཡོང་གི་རེད། ཁ་སང་འདིར་སླེབས་ནས་བོད་རིགས་རྒན་པ་མང་པོ་དང་མཇལ་བའི་སྐབས་བོད་མི་ནང་ཁུལ་ལ་མ་མཐུན་པ་ཕྲན་བུ་བྱུང་བ་དེར་འགན་ཁུར་ནས་སེམས་ཁྲལ་ཆེན་པོ་གནང་གི་འདུག།སྔོན་མ་དང་བསྡུར་ན་ཁ་སང་དེ་རིང་ཕྲན་བུ་ཡར་རྒྱས་འགྲོ་གི་ཡོད་ཅེས་གསུང་གི་འདུག།འདིའི་ཐོག་ལ་མུ་མཐུད་དེ་ཤུགས་བསྐྱོན་པ་ཡིན་ན་རྒྱལ་བ་རིན་པོ་ཆེ་ཐུགས་དགྱེས་པའི་མཆོད་པ་འབུལ་ཐུབ་པ་ཞིག་ཡོང་གི་རེད། རྣམ་པ་ཚོས་དེའི་ཐོག་ལ་འབད་བརྩོན་གནང་རོགས་ཞེས་ཞུ་འདོད་བྱུང།

བྷེ་རྗམ་ས་ཁུལ་འདི་བོད་རིགས་མང་ཤོས་ཡོད་པའི་ས་གནས་ཤིག་དང་མདོ་སྨད་པ་ཡང་མང་ཤོས་ཡོད་སའི་ས་གནས་ཤིག་རེད་འདུག།རྣམ་པ་ཚོས་སོ་སོའི་ངོས་ནས་ཚོགས་པ་བཙུགས་ནས་བོད་སྤྱི་པའི་དོན་ལ་ཕྱག་ལས་གནང་སྟེ་ཧུར་འབད་ཐག་གནང་འདུག།ས་གནས་མདོ་སྨད་པའི་སྒྲིག་འཛུགས་འདིའི་སྒྲིག་གཞི་དེ་ཁ་སང་ང་ལ་སྤྲད་བྱུང། སྒྲིག་གཞིའི་ནང་གི་དམིགས་ཡུལ་གཙོ་བོ་དེ་༸རྒྱལ་བ་རིན་པོ་ཆེའི་ཐུགས་ཀྱི་བཞེད་དགོངས་འགྲུབ་ཐབས་ཞུ་རྒྱུ་དང་བོད་གཞུང་ལ་རྒྱབ་སྐྱོར་ཞུ་རྒྱུ། མི་མང་ཉམ་ཐག་ལ་རོགས་རམ་བྱ་རྒྱུ་སོགས་ཤིན་ཏུ་ཡག་པོ་འདུག།དེ་བཞིན་ས་གནས་ཆུ་བཞི་སྒང་དྲུག་དང་དབུས་གཙང་ཚོགས་པ་གང་ཞིག་ཡིན་ནའང་འདི་དང་འདྲ་མཚུངས་ཡོད་ཀྱི་རེད་བསམས། སོ་སོའི་ཁོངས་ལ་ཡོད་པའི་མི་མང་ཚོར་སྒྲིག་གཞིའི་དགོངས་དོན་ལྟར་གྱི་ལམ་སྟོན་ཡག་པོ་ཞིག་གནང་དགོས་པ་དེ་གལ་ཆེན་པོ་རེད། སྒྲིག་གཞི་ཡིག་ཐོག་ལ་ཡོད་པ་ཙམ་མ་ཡིན་པར་ཁོངས་སོ་སོའི་མི་མང་ལ་སློབ་སྟོན་བྱས་ཏེ་སྒྲིག་གཞི་ལག་བསྟར་ཡོང་ཐབས་བྱ་དགོས། ས་གནས་གང་དུ་ཡིན་ནའང་ཁོངས་སོ་སོའི་མི་མང་རྣམས་སྒྲིག་འཛུགས་སོ་སོའི་སྒྲིག་འོག་ཏུ་བསྡུས་ཏེ་སྤྱི་པའི་ཐོག་ལ་ནུས་པ་མཉམ་སྤུངས་ཡོང་ཐབས་ཞུ་དགོས། བོད་མི་རྣམས་ཀྱི་ནུས་པ་ཁ་འཐོར་དུ་མ་ཕྱིན་པར་སྤྱི་པའི་དོན་ལ་ནུས་པ་མཉམ་སྤུངས་ཐུབ་པ་ཡིན་ན་ཕན་ཐོགས་ཡོང་གི་རེད་ཅེས་ཞུ་འདོད་བྱུང།

དུས་ཆེན་ཁག་ལ་བོད་མི་རྣམས་མཉམ་འཛོམས་བྱ་རྒྱུའི་གོ་སྐབས་འདུག་པ་ནི་ཤིན་ཏུ་ཡག་པོ་རེད། དེ་རིང་ལྟ་བུ་ཡིན་ན་ཡང་༸རྒྱལ་བ་རིན་པོ་ཆེའི་འཁྲུངས་སྐར་མཛད་སྒོ་དང་བསྟུན་ནས་བོད་མི་མང་པོ་ཞིག་མཉམ་འཛོམས་ཐུབ་པར་རྣམ་པ་ཚོས་འགྲོ་སོང་བཏང་ནས་གྲ་སྒྲིག་ཡག་པོ་གནང་འདུག་པས་དགའ་པོ་བྱུང་ལ་ཐུགས་རྗེ་ཆེ་ཞེས་ཞུ་རྒྱུ་ཡིན། བོད་པ་རྣམས་མཉམ་འཛོམས་ཐེངས་མང་པོ་གནང་དགོས་པ་འདི་ཤིན་ཏུ་གལ་ཆེན་པོ་རེད། མཉམ་དུ་འཛོམས་ན་ཕན་ཚུན་ངོ་ཤེས་པ་དང་རྒྱུས་ལོན་པ་ཡོང་གི་རེད་ལ། སྐད་ཆ་ཤོད་རྒྱུའི་གོ་སྐབས་ཀྱང་མང་བ་ཡོང་གི་རེད། ནང་ཁུལ་ལ་མཐུན་ལམ་ཡོང་བར་རང་བཞིན་གྱིས་ཕན་ཐོགས་ཡོང་གི་རེད། ལྷག་པར་དུ་བོད་མི་རྣམས་ཀྱིས་ཁྱིམ་ཚང་སོ་སོའི་ནང་དུ་བོད་སྐད་བསྐྱོན་དགོས་པ་དེ་གལ་ཆེན་པོ་རེད། ཅེས་བཀའ་སློབ་གནང་མཁན་མང་པོ་ཞིག་གིས་རྒྱུན་དུ་གསུང་གི་ཡོད། ཕ་མ་རྣམས་ཀྱིས་འགན་འཁྱེར་ནས་རྒྱུན་དུ་ཁྱིམ་ཚང་ནང་བོད་སྐད་བཤད་པ་ཡིན་ན་བུ་གུ་ཚོས་རང་བཞིན་གྱིས་བོད་སྐད་ཡག་པོ་ཤེས་ཐུབ་པ་ཞིག་ཡོང་གི་རེད། ངས་ད་ལྟ་འདིར་མཐོང་བ་ལ་ཆ་བཞག་ན་འདིར་སླེབས་པའི་མི་ཐོག་དང་པོ་ལས་མི་ཐོག་གཉིས་པ་མང་བར་ལྟ་བུར་ཆགས་འདུག།མི་ཐོག་གཉིས་པ་བོད་མི་ཡག་པོ་ཞིག་ཏུ་གསོ་སྐྱོང་བྱེད་དགོས་པའི་འགན་དེ་མི་ཐོག་དང་པོ་ཁྱེད་རྣམས་ལ་བབས་ཡོད། སེམས་ཤུགས་ཅན་མང་པོ་ཞིག་གིས་མི་རབས་གཞོན་པ་རྣམས་ཀྱིས་བོད་ཀྱི་སྐད་དང་ཡི་གེ་ཤེས་ཐབས་ལ་འབད་བརྩོན་བྱེད་ཀྱི་འདུག་པ་ནི་ཤིན་ཏུ་ཡག་པོ་རེད། ཡིན་ན་ཡང་ཁྱིམ་ཚང་སོ་སོ་དང་ཕ་མ་སོ་སོས་འགན་ལེན་དགོས་པ་དེ་བས་ཀྱང་གལ་ཆེན་པོ་རེད་ཅེས་ཞུ་འདོད་བྱུང། ངས་སྐད་ཆ་གང་བཤད་པ་དེ་ཕན་ཐོགས་ཤིག་ཨེ་ཡོང་བསམས་ནས་བཤད་ཀྱི་ཡོད་སྟབས་སྙན་པོ་དང་མཛེས་པོ་ཨེ་ཡོང་མི་ལྟ་བར་མདའ་བརྒྱབས་པ་བཞིན་ཐད་ཀར་ཞུས་པ་ཡིན།

དེ་རིང་ས་གནས་མདོ་སྨད་མི་མང་གི་ངོས་ནས་ང་ལ་རྗེས་དྲན་གྱི་གཟེངས་རྟགས་ཤིག་གནང་བ་དེར་ཐུགས་རྗེ་ཆེ། མདོ་སྨད་མི་མང་གིས་ང་བོད་སྤྱི་པའི་མི་ཞིག་ཡིན་པ་དང། ༸རྒྱལ་བ་རིན་པོ་ཆེའི་ཞབས་ཕྱི་རྙིང་པ་ཞིག་ཡིན་པ་ལ་བཀའ་དྲིན་རྗེས་དྲན་གནང་བར་ཐུགས་རྗེ་ཆེ་ཞུ་རྒྱུ་ཡིན། ངའི་ངོས་ནས་ནམ་ཡིན་ནའང་རྒྱུན་དུ་མདོ་སྨད་སྤྱི་པའི་དོན་ལ་སྐད་ཆ་བཤད་ཁུལ་བྱེད་ཀྱི་ཡོད། སྤྱིར་མདོ་སྨད་ཀྱི་བླ་ཆེན་ཡོངས་རྫོགས་ཀྱིས་བོད་སྤྱི་པ་དང་མདོ་སྨད་པ་སྤྱི་པའི་དོན་དུ་མི་ཐོག་ནས་མི་ཐོག་བར་ཕྱག་ལས་གནང་ཡོད། ང་ཚོ་ལ་མཚོན་ན་ཡང་གནའ་སྔ་མོ་ས་གནས་དང་གཤོག་ག་མ་འདྲ་བ་གཉིས་ཀྱི་བར་དུ་མ་འཆམ་པའི་ཁ་མཆུ་བྱུང་བའི་སྐབས་ཀིརྟི་ཚང་གིས་འགན་བླངས་ནས་ཁ་མཆུ་བཤད་དེ་ཕྱོགས་གཉིས་ཀ་མཐུན་ཐབས་བྱེད་ཀྱི་ཡོད། མདོ་སྨད་ཕྱོགས་ཀྱི་བླ་ཆེན་ཡོངས་རྫོགས་ཀྱིས་ཕྱག་ལས་དེ་ལྟར་གནང་གི་ཡོད། ང་ལ་མཚོན་ན་ད་ལྟའི་བར་དུ་མདོ་སྨད་སྤྱི་པ་ལ་ཕན་ན་སྙམ་པའི་ཐོག་ནས་གང་ཐུབ་ཐུབ་ཀྱིས་ཞབས་ཕྱི་ཞུས་པའི་ཁུལ་ཡིན་ལ། བོད་སྤྱི་པ་ལ་ཕན་ན་སྙམ་ནས་༸རྒྱལ་བ་རིན་པོ་ཆེའི་ཞབས་ཕྱི་གང་ནུས་ཞུས་པ་ཡིན། ཆོས་ཕྱོགས་ནས་ཡིན་ནའང་བཀའ་སློབ་གང་གནང་བ་དེ་ལ་ལགས་སོ་ཞུས་ནས་ཞབས་ཕྱི་ཞུས་པའི་ཁུལ་ཡིན། ཆབ་སྲིད་ཀྱི་ཕྱོགས་ནས་ཡིན་ནའང་བཀའ་བློན་ལ་ཐུག་གི་བར་དུ་གང་ཐུབ་པ་དང་ནུས་པ་དེ་ཞུས་པའི་ཁུལ་ཡིན། ངས་བཀའ་བློན་གྱི་དམ་འབུལ་ཞུས་པའི་སྐབས་༸རྒྱལ་བ་རིན་པོ་ཆེ་དང་ཁྲིམས་དཔོན་རྣམ་པ་དང་བཅས་བཞུགས་པའི་དཀྱིལ་དུ། བོད་སྤྱི་པའི་ལས་དོན་སྒྲུབ་ཀྱི་ཡིན། ཅེས་དམ་བཅའ་ཕུལ་བ་ཡིན། ༸རྒྱལ་བ་རིན་པོ་ཆེའི་སྐུ་མདུན་ནས་དམ་བཅའ་ཕུལ་བ་དེ་མི་ཚེ་གཅིག་གི་རིང་ལ་ལག་བསྟར་ཞུ་དགོས་པ་རེད་མ་གཏོགས་བཀའ་བློན་གྱི་ལས་གནས་ནས་གཟུར་བའི་རྗེས་མནའ་སྐྱེལ་དམ་བཅས་པ་དེ་ལ་གནས་མི་དགོས་པ་ཞིག་གཏན་ནས་མིན་དུས། ༸རྒྱལ་བ་རིན་པོ་ཆེའི་སྐུ་མདུན་ནས་ཁས་ལེན་དམ་བཅའ་ཞུས་པ་བཞིན་ད་ལྟ་ལ་ཐུག་གི་བར་དུ་རང་ལ་ནུས་པ་གང་ཡོད་ཀྱིས་འབད་བརྩོན་བྱས་པ་ཡིན་དུས། རྣམ་པ་ཚོས་ང་སྤྱི་པའི་མི་དང་སྤྱི་པའི་ལས་ཀ་བྱེད་མཁན་ཞིག་ཏུ་ངོས་འཛིན་གནང་ནས་གཟེངས་རྟགས་གནང་བ་ལ་ཐུགས་རྗེ་ཆེ་ཞུ་རྒྱུ་ཡིན། ཡིན་ནའང་ལྷག་བསམ་དང་ཡོན་ཏན་གཉིས་ལ་ཁྱད་པར་ཡོད། མི་སུ་ཞིག་ཡིན་ན་ཡང་ལྷག་བསམ་བྱེད་པ་ལ་ཚད་གཞི་མེད་ཀྱང། མི་སོ་སོའི་ཡོན་ཏན་དང་འཇོན་ཐང་ལ་ཚད་གཞི་ཡོད་དུས་ང་ལ་མཚོན་ན་ཡོན་ཏན་དང་འཇོན་ཐང་གི་ཚད་གཞི་ཞིག་ཡོད་པ་དེ་ལས་ལྷག་པ་ཞིག་བྱེད་ཐུབ་ཀྱི་མེད་ནའང། ལྷག་བསམ་ལ་ཚད་གཞི་མེད་པ་ཡིན་དུས་སྔོན་མ་ཡིན་ནའང་ལྷག་བསམ་རྣམ་དག་བྱས་པ་ཡིན་ལ་མ་འོངས་པ་ལ་ཡང་ལྷག་བསམ་རྣམ་དག་བྱེད་ཀྱི་ཡིན། ང་ཆོས་དང་ཆབ་སྲིད་གཉིས་ཀའི་ཡོན་ཏན་གང་ཡང་ཡོད་མཁན་ཞིག་མིན་ནའང་ལྷག་བསམ་རྣམ་དག་གི་ཐོག་ནས་ད་ལྟའི་བར་དུ་འབད་བརྩོན་ཞུས་པའི་ཁུལ་ཡིན། 

རྣམ་པ་ཚོས་འདིར་ཡིག་ཆ་ཞིག་བཟོས་འདུག་པའི་ནང་ང་ལ་བསྟོད་པ་ཆེན་པོ་གནང་འདུག་ཀྱང་ངས་ཁྱེད་ཚོས་བསྟོད་པ་གནང་བ་ལྟར་གྱི་འཇོན་ཐང་དང་ཞབས་ཕྱི་ཆེན་པོ་ཞུས་པ་གང་ཡང་མེད། ལྷག་པར་དུ་བོད་ནང་ནས་གསང་བའི་སྒྲིག་འཛུགས་ཤིག་གིས་ང་ལ་གསེར་གྱི་རྟགས་མ་ཞིག་གནང་འདུག་ཅེས་པ་ཡིག་ཆ་འདིའི་ནང་དུ་འཁོད་འདུག།ང་ཕྱི་ལོ་ ༡༩༨༤ ལོར་ནང་དོན་བོད་གཞུང་གི་སྐུ་ཚབ་དང་རྣམ་པ་གཉེན་འཕྲད་དང་ལྟ་སྐོར་གྱི་ངོ་བོའི་ཐོག་ནས་བོད་དུ་ཕྱིན་པ་རེད། སྐབས་དེར་བོད་མི་སུ་འདྲ་ཞིག་ལ་ཐུག་པ་ཡིན་ནའང་ངའི་སར་ཡོང་ནས་མིག་ནས་མཆི་མ་འདོན་བཞིན་དུ་བདེ་སྡུག་གི་སྐད་ཆ་ཤོད་ཀྱི་འདུག།བོད་ཆོལ་ཁ་གསུ་གྱི་མི་མང་པོ་ཞིག་ལ་ཐུག་པ་ཡིན། རྒྱ་ནག་པེ་ཅིང་གིས་གཙོས་པའི་རྒྱ་ནག་ནང་དུ་ཡོད་པའི་བོད་རིགས་ལས་བྱེད་པ་མཐོ་གྲས་༸ཀུན་གཟིགས་པཎ་ཆེན་རིན་པོ་ཆེ་དང། འབའ་པ་ཕུན་ཚོགས་དབང་རྒྱལ་སོགས་བོད་རིགས་དཔོན་པོ་མང་པོ་ཞིག་ལ་མཇལ་བ་ཡིན། བོད་ཆོལ་ཁ་གསུམ་གྱི་མི་སེམས་ཤུགས་ཅན་མང་པོ་ཞིག་དང་མཇལ་རྒྱུ་བྱུང། ཐ་ན་ཨ་མ་རྒད་མོ་ཞིག་ཡིན་ནའང་ང་ཡོང་གི་ཡོད་པ་མཐོང་བའི་སྐབས་ངའི་འཁྲིས་ལ་ཡོང་ནས། བོད་རང་དབང་རང་བཙན་མྱུར་བ་མྱུར་དུ་ཐོབ་པར་ཤོག།༸རྒྱལ་བ་ཡིད་བཞིན་ནོར་བུ་སྐུ་ཚེ་བརྟན་པར་ཤོག ཅེས་ངའི་གདོང་ལ་བལྟས་ནས་སྨོན་ལམ་བརྒྱབས་ནས་རེ་བ་བྱེད་ཀྱི་འདུག ཁོང་ཚོའི་ངོས་ནས་ལྷག་བསམ་རྣམ་དག་གིས་ང་ལ་རྟགས་མ་ཞིག་སྤྲད་པ་རེད། ཡིན་ནའང་གནས་ཚུལ་འདི་ཕྱི་ལ་འཆལ་བ་ཡིན་ན་ཁོང་ཚོའི་སྲོག་ལ་འབབ་རྒྱུའི་ཉེན་ཁ་ཡོད་པ་ཡིན་དུས་ངས་གསང་བ་བྱས་ཏེ་ཕྱི་ལོགས་ལ་གཏན་ནས་སྒྲོགས་མེད། ལོ་མང་པོ་ཕྱིན་ནས་མི་དེ་དག་གྲོངས་ཚར་བའི་རྗེས་སུ་ཅ་ལག་དེ་ཕྱི་ལ་བཏོན་ནས་བརླག་མི་འགྲོ་བའི་དོན་དུ་ཁ་བྱང་ཞིག་བྲིས་ནས་བཞག་པ་ཡིན། དེ་འདྲ་ཞིག་མ་བྱས་ན་ཁོང་ཚོས་ང་ལ་ལྷག་བསམ་གནང་བ་དེ་ལ་ངས་སྣང་ཆུང་བྱས་པ་ལྟ་བུར་འགྲོ་རྒྱུ་རེད་བསམ་པ་མ་གཏོགས་ངས་གནས་ཚུལ་འདི་ཕྱི་ལ་བསྒྲས་མ་མྱོང། འདིས་བོད་ནང་གི་རྒྱ་ཆེའི་མི་མང་གི་སེམས་ཤུགས་མཚོན་གྱི་ཡོད་པ་མ་གཏོགས་ཕྱི་ལ་བསྒྲགས་དགོས་པའི་རྒྱུ་མཚན་མཐོང་གི་མེད། ཁོང་ཚོས་ང་ལ། དགྲ་ཡི་དགྲ་ཡིན་ན་ང་ཚོའི་གཉེན་ཡིན། ཅེས་མའོ་ཙེ་ཏུང་གིས་གསུངས་པའི་ཚིག་དེ་ལུང་དྲངས་ནས་ད་རེས་ཁྱེད་རྒྱ་ནག་ནས་ཡར་མཐར་ཕུད་བཏང་བ་དེས་ཁྱེད་རང་གི་ལས་ཀ་བྱེད་སྟངས་ཡོངས་རྫོགས་ང་ཚོས་གསལ་པོར་ཧ་གོ་སོང། སྔོན་མ་ནས་༸རྒྱལ་བ་རིན་པོ་ཆེའི་ཞབས་ཕྱི་ཧུར་ཐག་འབད་ཐག་ཞུས་འདུག་ལ་མ་འོངས་པར་ཡང་༸རྒྱལ་བ་རིན་པོ་ཆེའི་ཞབས་ཕྱི་ཧུར་ཐག་འབད་ཐག་ཅིག་ཞུ་རོས་བྱོས། ཞེས་གསུངས་བྱུང། མི་ཞིག་ཕྱི་ལོགས་ནས་ང་དང་ཐུག་པའི་སྐབས་ཁ་འཛུམ་ནས་སྐད་ཆ་ཤོད་ཐུབ་ཀྱི་ཡོད་ནའང་མིག་ཆུ་བཏོན་ནས་སྐད་ཆ་ཤོད་མི་ཐུབ་པའི་སྐབས་ཡིན། ཁང་པའི་ནང་དུ་སླེབས་པའི་སྐབས་ངུས་ནས་སེམས་ནང་གི་སྡུག་བསྔལ་བཤད་ཀྱི་ཡོད། གནས་ཚུལ་འདི་ང་རྐྱང་པ་མ་ཡིན་པར་ཕྱི་རྒྱལ་ཁག་ཏུ་༸རྒྱལ་བ་རིན་པོ་ཆེའི་སྐུ་རྗེས་སུ་འབྲངས་པའི་བོད་པ་ཡོངས་རྫོགས་ལ་རེ་བ་དེ་ལྟར་བརྒྱབས་ཀྱི་ཡོད། དེ་ནས་ང་ཕྱིར་རྒྱ་གར་དུ་ཡོང་བའི་རྗེས་ནས་བོད་གཞུང་གི་ནང་ལ་ཐེམ་པ་རིམ་འཛེགས་ལྟ་བུས་རང་གིས་གང་ནུས་ཀྱིས་ཞབས་ཕྱི་ཧུར་ཐག་ཞུས་པ་ཡིན། རྣམ་པ་ཚོ་ཡིན་ན་ཡང་ཁོང་ཚོའི་རེ་བ་དེ་འགྲུབ་ཐབས་གནང་དགོས་པའི་འགན་ཡོད། ཕྱི་རྒྱལ་ཁག་ཏུ་སླེབས་ནས་རིམ་གྱིས་འཚོ་གོས་དང་ཡིག་ཆ་སོགས་ཀྱི་དཀའ་ངལ་མེད་པར་ཆགས་པ་དང་ད་སྐྱིད་པོ་ཡིན་བསམས་ནས་སྡོད་རྒྱུ་ཡོད་པ་མ་རེད། ང་ཚོ་མི་རེ་ངོ་རེ་ལ་བོད་རྒྱ་ཆེའི་མི་མང་གིས་འགན་རེ་བསྐུར་ཡོད་པ་ནམ་ཡང་བརྗེད་མི་ཉན། 

ད་ལྟ་འདི་ལ་ཡོད་པའི་བོད་མི་ཡོངས་རྫོགས་ཤོག་ག་མ་འདྲ་བ་དང་ལུང་ཚན་མ་འདྲ་བ་སྣ་ཚོགས་ནས་ཕེབས་པ་ཡིན་དུས། རང་བཞིན་གྱིས་སོ་སོ་ཡོང་ཁུངས་ཀྱི་ཤོག་ག་དེ་དང་ལུང་པ་དེའི་སྐུ་ཚབ་ལྟ་བུར་ཆགས་ཀྱི་ཡོད། ཁྱེད་རྣམ་པས་ཕྱི་ལོགས་ལ་ལས་ཀ་ཡག་པོ་བྱས་པ་ཡིན་ན་སོ་སོའི་ཕ་མ་དང་ནང་མི། ལུང་པའི་མི་མང་དང་བཅས་པས་ང་ཚོའི་མི་དེས་ཕྱི་ལོགས་ལ་ལས་ཀ་ཡག་པོ་བྱེད་ཀྱི་འདུག་ཅེས་བསྟོད་བསྔགས་བྱས་ཏེ་མཐེ་མོ་སྟོན་གྱི་ཡོད། ཕ་མ་རིགས་ཤིག་གིས་ཁྱེད་རང་གིས་ཕྱི་ལོགས་ལ་ལས་ཀ་ཡག་པོ་བྱས་ནས་བསྡད་ཀྱི་འདུག་པས་ཕ་མ་ལ་ཁ་མ་ཐུག་ཀྱང་འགྱོད་པ་མེད་ཅེས་ཤོད་ཀྱི་ཡོད། ཁྱེད་རང་ཚོ་མི་རེ་རེའི་ངོས་ནས་འགན་ཁུར་ཏེ་ཕྱག་ལས་ཡག་པོ་གནང་དགོས་པ་དེ་གལ་ཆེན་པོ་རེད། ལོ་འགའ་ཤས་ཀྱི་གོང་དུ་ང་བྷེ་རྗམ་ལ་ཡོང་བའི་སྐབས་དང་མི་འདྲ་བར་དེང་སང་བོད་པ་རྣམས་སྐད་ཡིག་དང་འཚོ་བ་གང་ཅིའི་ཐད་ནས་ཡར་རྒྱས་ཆེན་པོ་ཕྱིན་འདུག།མ་འོངས་པར་ཡང་མུ་མཐུད་ཡར་རྒྱས་ཀྱི་ཕྱོགས་ལ་འབད་བརྩོན་གནང་རོགས་ཞེས་ཞུ་རྒྱུ་ཡིན། 

ཕྱི་རྒྱལ་དུ་ཡོད་པའི་བོད་མི་སྐོར་ཞིག་གིས་རང་གི་འཚོ་བ་དང་དཔལ་འབྱོར་ཕྲན་བུ་ཡར་རྒྱས་ཕྱིན་པ་དང་རྒྱས་སྤྲོས་དང་ཀྲོག་ཀྲོག་ལྟ་བུ་བྱེད་པ་མ་གཏོགས་བུ་གུའི་ཤེས་ཡོན་སློབ་སྦྱོང་ཡར་རྒྱས་ཀྱི་དོན་དུ་འགྲོ་སོང་གཏོང་གི་མི་འདུག་ཅེས་འགའ་ཤས་ཀྱིས་བཤད་ཀྱི་འདུག།སྐད་ཆ་འདི་བདེན་པ་ཡིན་མིན་མི་ཤེས་ཀྱང་གང་ལྟར་ཡང་བོད་ཀྱིས་མ་འོངས་པའི་རེ་བ་རྒྱག་ས་དང་བོད་ཀྱི་སོན་རྩ་ད་ལྟའི་བུ་ཕྲུག་ཆུང་ཆུང་འདི་ཚོ་ཡིན་དུས། ཕ་མ་སོ་སོས་འགན་བླངས་ཏེ་བུ་ཕྲུག་ཚོ་སློབ་གྲྭ་ཚད་ལྡན་དང་སློབ་གྲྭ་ཆེ་ཁག་ལ་གཏོང་དགོས། འདིར་རྒྱ་གར་དང་མི་འདྲ་བར་སློབ་སྦྱོང་གི་གོ་སྐབས་ཡག་པོ་ཡོད་པ་དེ་འཕྲོ་བརླག་ཏུ་མི་གཏོང་རྒྱུ་འདི་ཤིན་ཏུ་ནས་གལ་ཆེན་པོ་རེད་ཅེས་ཞུ་འདོད་འབྱུང།

ཕྱི་རྒྱལ་ཁག་ཏུ་ཡོད་པའི་བོད་པ་རྣམས་ཀྱིས་ཡ་རབས་སྤྱོད་བཟང་གི་ཐོག་ལ་ཐུགས་སྣང་མཛད་དགོས་པ་འདི་ཤིན་ཏུ་ནས་གལ་ཆེན་པོ་རེད། ཐོག་མར་ཕྱི་རྒྱལ་ལ་ཡོང་བའི་སྐབས་མང་པོ་ཞིག་གིས་ཐབས་ལམ་སྣ་ཚོགས་ཀྱི་ཐོག་ནས་ཡོང་དགོས་ཤར་ཡོད་ནའང། ད་ཆ་འཚོ་གོས་སོགས་ཀྱི་དཀའ་ངལ་སེལ་ནས་ཡོད་པའི་སྐབས་འདི་ལ་ཡ་རབས་སྤྱོད་བཟང་གི་ཐོག་ལ་ཤུགས་བསྐྱོན་དགོས་པ་འདི་ཤིན་ཏུ་གལ་ཆེན་པོ་རེད། སྔོན་མ་ང་སིད་སི་ལ་འགྲོ་བའི་སྐབས་ལུང་པ་དེའི་ཡུལ་མི་རྣམས་ཀྱིས་ཕྱི་ལོགས་ནས་ཡོང་བའི་གྲས་ནས་བོད་མི་རྣམས་ཁོང་ཚོས་ཡིད་ཆེས་བློ་གཏོད་བྱེད་ས་ཡག་ཤོས་ཤིག་ཏུ་ངོས་འཛིན་བྱེད་ཀྱི་ཡོད་ཅེས་གསུངས་སོང། འདིར་ཡོད་པའི་བོད་མི་རྣམས་ཀྱིས་ཀྱང་ལུང་པ་འདིའི་ཡུལ་མི་རྣམས་ཀྱིས་ཡིད་ཆེས་བྱེད་ས་ཡོད་པ་ཞིག་དང། བོད་པ་རྣམས་མི་ཡག་པོ་ཡོད་པ་རེད། ཡིད་ཆེས་བྱེད་ཆོག་གི་རེད། སྐྱག་རྫུན་བཤད་ཀྱི་མ་རེད། ༸རྒྱལ་བ་རིན་པོ་ཆེའི་སློབ་མ་རེད་ཟེར་བ་ལྟ་བུའི་ཡ་རབས་སྤྱོད་བཟང་ལྡན་པ་ཞིག་གནང་དགོས། བོད་པ་སུ་འདྲ་ཞིག་ཡིན་ན་ཡང་རུང། རང་གི་མིང་དང་མཉམ་དུ་བོད་པ་རེད་ཟེར་བ་དང་༸རྒྱལ་བ་རིན་པོ་ཆེའི་སློབ་མ་རེད། ཟེར་བའི་མིང་འདི་གཉིས་རང་བཞིན་གྱིས་འབྱར་ནས་ཡོད་དུས། ཁྱེད་ཚོས་བྱ་བ་བཟང་པོ་ཞིག་བྱས་པ་ཡིན་ནའང་བོད་པ་ཞིག་གིས་བྱ་བ་བཟང་པོ་བྱས་པ་རེད། ༸རྒྱལ་བ་རིན་པོ་ཆེའི་སློབ་མ་ཞིག་གིས་བྱ་བ་བཟང་པོ་བྱས་པ་རེད་ཅེས་ཟེར་རྒྱུ་དང་། བྱ་བ་ངན་པ་དང་སྡུག་ཆག་ཅིག་བྱས་པ་ཡིན་ནའང། བོད་པ་ཞིག་གིས་བྱས་པ་རེད། ༸རྒྱལ་བ་རིན་པོ་ཆེའི་སློབ་མ་ཞིག་གིས་བྱས་པ་རེད་ཅེས་ཟེར་རྒྱུ་ཡིན། རྒྱུན་དུ་མིང་དེ་གཉིས་རང་གི་མིང་དང་མཉམ་དུ་འབྱར་ནས་ཡོད་བསམ་པའི་ཐོག་ནས་ཡ་རབས་སྤྱོད་བཟང་བྱ་དགོས་པ་འདི་གལ་ཆེན་པོ་རེད་ཅེས་ཞུ་འདོད་བྱུང་།

དེ་རིང་འདིར་འཁྲུངས་སྐར་དང་འབྲེལ་བའི་མཛད་སྒོ་ཤིན་ཏུ་གྲ་རྒྱས་པོ་གནང་འདུག ཟླ་བྷེ་ལགས་རྩོམ་རྩལ་ལ་ཤིན་ཏུ་མཁས་པ་ཡོད་དུས་ང་ལ་བསྟོད་པ་ཆེན་པོ་བྱས་ཡོད་ཚོད་འདུག་སྟེ་ངས་ཨ་མཆོག་གིས་ལེགས་པོ་ཞིག་གོ་ཐུབ་མ་སོང་ནའང་ཐུགས་རྗེ་ཆེ། རྣམ་པ་ཚོས་བོད་མི་མང་པོ་ཞིག་མཉམ་དུ་འཛོམས་ཐུབ་པའི་གྲ་སྒྲིག་ཡག་པོ་གནང་འདུག་པར་ཐུགས་རྗེ་ཆེ་ཞེས་ཞུ་རྒྱུ་ཡིན། ཐུགས་རྗེ་ཆེ། ཕྱི་ལོ་ ༢༠༡༩ ལོའི་ཟླ་ ༦ ཚེས་ ༡ ཉིན།