དུས་འཁོར་རྒྱུད་འགྲེལ་ཆེན་མོའི་ཕྱག་དཔེ་དབུ་འབྱེད་དང་རྒྱལ་བའི་བཀའ་དྲིན་རྗེས་དྲན་གྱི་མཛད་སྒོའི་ཐོག་༸སྐྱབས་རྗེ་ཀིརྟི་རིན་པོ་ཆེ་མཆོག་གིས་བསྩལ་པའི་གསུང་བཤད།

༄༅།། རྨད་དུ་བྱུང་བའི་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོའི་ཕྱག་དཔེ་དབུ་འབྱེད་དང་༸རྒྱལ་བའི་བཀའ་དྲིན་རྗེས་དྲན་གྱི་མཛད་སྒོའི་ཐོག་ཕེབས་པའི་སྐུ་མགྲོན་གཙོ་བོ་དཔལ་ལྡན་སྐུ་ངོ་སྲིད་སྐྱོང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག དགའ་ལྡན་ཕོ་བྲང་གི་དྲུང་ཆེ། དུས་འཁོར་རྒྱུད་འགྲེལ་འདིའི་རྒྱུན་འཛིན་དང་འཆད་ཉན་གནང་མཁན་བྱ་དོར་རིན་པོ་ཆེ།གཞན་ཡང་སྐུ་མགྲོན་རྣམ་པ། རྩོམ་སྒྲིག་གཙོ་བོ་གནང་མཁན་གྱི་རྩོམ་སྒྲིག་པ་རྣམ་པ་བཅས་ལ། ངས་སྐད་ཆ་ཐུང་ཐུང་ཞིག་ཞུ་རྒྱུ་ཡིན།

ང་དང་དམིགས་བསལ་གྱིས་འབྲེལ་བ་ཡོད་པའི་ཀིརྟིའི་མཚན་ཞབས་རིན་པོ་ཆེ་མཆོག་གིས། ཆད་ལ་ཉེ་བའི་དུས་འཁོར་རྒྱུད་འགྲེལ་གྱི་འཆད་ཉན་སླར་གསོའི་མཛད་སྒོའི་ཐོག་ང་ལ་ཡོང་རོགས་ཞེས་གསུང་གི་འདུག ང་ཡོང་ནས་ཕན་ཐོགས་གང་ཡང་ཡོད་པ་མ་རེད་ཅེེས་ཞུས་པ་ཡིན་ཡང་། ཁོང་རྣམ་པས་ཨུ་ཚུགས་བསྐྱོན་གྱི་འདུག་པར་བརྟེན་ཀིརྟིའི་མཚན་ཞབས་རིན་པོ་ཆེ་ང་དང་དམིགས་བསལ་འབྲེལ་བ་ཡོད་པ་རྒྱུ་མཚན་དུ་བྱས་ནས་དེ་རིང་འདིར་མཛད་སྒོར་བཅར་བ་ཡིན།

༄༅།།ལོ་གསར་རྙིང་བར་གྱི་༸སྐྱབས་རྗེ་ཀིརྟི་རིན་པོ་ཆེ་མཆོག་གི་མཛད་འཕྲིན་སྐོར་གནས་ཚུལ་མདོར་བསྡུས།

ཕྱི་ལོ་ ༢༠༢༡ ཟླ་ ༡༢ ཚེས་ ༢༠ ཉིན་བཞུགས་སྒར་ནས་ཕེབས་འཁོར་ནང་ཆིབས་བསྒྱུར་གྱིས་ཕྱི་ཟླ་ ༡༢ ཚེས་ ༢༣ ཉིན་རྡོར་གདན་ཀིརྟིའི་སྒར་བསམ་ཡས་གླིང་དུ་༸ཞབས་སོར་བདེ་བར་འཁོད།

ཕྱི་ཟླ་ ༡༢ ཚེས་ ༢༤ ཉིན་ཆོས་སྲུང་རྣམས་ལ་བསང་གསོལ་བསྡུས་པ་མཛད།

ཕྱི་ཟླ་ ༡༢ ཚེས་ ༢༦ ཉིན་ནས་བཟུང་སློབ་དེབ་བློ་གསལ་མགུལ་རྒྱན་གྱི་ཁ་སྐོང་སློབ་དེབ་ཁག་བཞི་རྩོམ་སྒྲིག་སོགས་ཕྱག་ལས་དུ་མའི་དབུ་བཙུགས།

ཕྱི་ཟླ་ ༡༢ ཚེས་ ༢༩ དགའ་ལྡན་ལྔ་མཆོད་ཆེན་མོའི་ཉིན་སྔ་དྲོ་དགའ་ལྡན་ཁྲི་ཐོག་ཁང་ནས་གོ་སྒྲིག་ཞུས་པ་ལྟར་དྲ་ལམ་བརྙན་འཕྲིན་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་གསན་བཞེས་དང་། ཕྱི་དྲོ་རྗེ་ཉིད་དབུར་བཞུགས་སྟོན་འཁོར་ལྷན་རྒྱས་ནས་བླ་མ་མཆོད་པ་དང་རྗེའི་གསང་རྣམ་སོགས་ཞལ་འདོན་དུ་མ་དང་། དགོང་མོ་དམིགས་བརྩེ་མ་རྒྱང་འཐེན་དང་འབྲེལ་མར་མེ་དང་གློག་མཆོད་གང་མང་ཕུལ་ཏེ་རྡོར་གདན་ཀིརྟིའི་སྒར་བསམ་ཡས་གླིང་དུ་དགའ་ལྡན་ལྔ་མཆོད་ཆེན་མོ་ཐེངས་དང་པོ་འཚོགས་པ་གནང་།

ལོ་འདིའི་སློབ་གཉེར་གྱི་བྱེད་སྒོ་ཐ་མ་ཚད་མའི་དགུན་ཆོས་དང་ལོ་རྒྱུགས་འཁོར་རྒྱུགས་སྤྲོད་བཅས་ལེགས་པར་གྲུབ།

༄༅།། ཕྱི་ལོ་ ༢༠༢༡ ཟླ་ ༤ ཚེས་ ༡ ཉིན་སློབ་འགོ་བཟུང་སྟེ་ཕྱི་ལོ་ ༢༠༢༡ ཟླ་ ༡༢ ཟླ་མཇུག་བར་ཟླ་གསུམ་གསུམ་གྱི་རྒྱུགས་སྤྲོད་ཁག་ལེགས་པར་གྲུབ་ནས་ཕྱི་ལོ་ ༢༠༢༢ ཟླ་ ༡ ཚེས་ཤར་ནས་དབུ་མ་འཛིན་གྲྭ་ནས་ཁ་དོག་དཀར་དམར་བར་འཛིན་གྲྭ་ཁག་ལྔས་ཚད་མའི་དགུན་ཆོས་ལ་མཉམ་བཞུགས་གནང་སྟེ་ཉིན་གྲངས་ཉེར་ལྔའི་རིང་སྐབས་བབ་རྣམ་འགྲེལ་གྱི་གཞུང་ཚན་ཁག་ལ་ཁྲིད་རྩོད་ཟུང་འབྲེལ་གྱིས་ཚོགས། མཛོད་འདུལ་འཛིན་གྲྭ་གཉིས་ཀྱིས་དེའི་རིང་ལོ་འཁོར་རྒྱུགས་སྤྲོད་ཀྱི་རང་སྦྱོང་གནང་། ཕྱི་ཚེས་ ༢༨ ཉིན་དཔེ་ཁྲིད་དགེ་རྒན་རྣམས་དང་སློབ་གཉེར་པ་ཡོངས་རྫོགས་མཉམ་འཛོམས་ཐོག་སྔ་དྲོ་ཆོས་མཚམས་སྨོན་ལམ་ཚོགས་པ་དང་། ཕྱི་དྲོ་ནས་ཚད་མའི་དགུན་ཆོས་ལ་ཕེབས་མཁན་རྣམས་ཀྱིས་ཚད་མའི་རྒྱུགས་སྤྲོད་དང་། མཛོད་འདུལ་འཛིན་གྲྭ་གཉིས་ཀྱིས་ལོ་འཁོར་རྒྱུགས་སྤྲོད་བཅས་དབུ་འཛུགས་གནང་སྟེ། ཕྱི་ཚེས་ ༣༡ ཉིན་ལེགས་པར་གྲུབ། ཕྱི་ཟླ་ ༢ ཚེས་ ༡ ནས་ཆོས་མཚམས་ཆེན་མོ་ཡིན་པ་བཅས་སོ། །

གསལ་བསྒྲགས།

༄༅།། མཚུངས་མེད་རང་གྲྭའི་བླ་གྲྭ་དགེ་སློབ་ལས་བྱེད་ཡོངས་ཀྱི་༸གསེར་སྙན་རིན་པོ་ཆེར་ཞུ་སྙིང་།

རང་ཅག་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་༸རོང་ཆེན་བསྟན་པའི་སྒྲོན་མེ་༸སྐྱབས་མགོན་རྡོ་རྗེ་འཆང་ཆེན་པོ་མཆོག་གིས་ཆེར་སྙིགས་ལྔ་བདོའི་དུས་འདིར་ཡང་རང་ཅག་རྣམས་ཐུགས་རྗེ་བྱིན་རླབས་ཀྱི་ཐུ་འོག་ནས་མི་འབོར་བར་བདག་སོགས་གདུལ་བྱ་རྒྱ་མཚོའི་མགོན་དཔུང་དམ་པར་སྐུ་ཚེ་༸ཞབས་པད་མི་འགྱུར་རྡོ་རྗེའི་གཤིས་སུ་བརྟན་པའི་བརྟན་བཞུགས་ཞབས་བརྟན་གཙོ་བོ་དང་༸རྒྱལ་བ་དགྱེས་པའི་མཆོད་སྤྲིན་ངོ་མ་ནི། རང་རེ་གཞིས་བྱེས་གཉིས་ཀྱི་འབྲེལ་ཡོད་དགོན་སྡེ་སོ་སོའི་སློབ་གཉེར་པ་རྣམས་ནས་འཆད་ཉན་སློབ་གཉེར་ཡར་རྒྱས་ཀྱི་ཆེད་ཀིརྟིའི་དགེ་རྩ་ཚོགས་པའི་སྤྱི་ཁྱབ་རྒྱུན་ལས་ཁང་ནས་རྒྱ་བོད་ཀྱི་གཞུང་ཆེན་སོགས་བློ་འཛིན་གྱིས་ཁུངས་སོ་སོར་རྒྱུགས་འབུལ་བྱས་ན་ལེགས་པའི་ལམ་སྟོན་གནང་བ་བཞིན།